الله عليكى يا مصر

امبارح كان يوم ستة اكتوبر اليوم الى انتصرنا فيه بارادة ولاد البلد الجدعان اوى

كان يوم عظيم فى تاريخ مصر يوم توحد فيه المصريون جميعا لطرد عدونا

عايزة اسالكوا سؤال احنا نعرف ايه عن اكتوبر نعرف ايه عن النصر يوميها

مجرد كلام فى كتب ومجرد صور شفناها فى التليفزيون عن الحرب

اتعودنا ان كل سنة ييجى اليوم ده

بس عمرنا حسناه؟

عمرنا حسينا بقيمته بجد وبقيمة الشهدا الى ضحوا بنفسهم عشان البلد

فى التليفزيون لو قلبنا نلاقى برامج التوك شو وهى مستضيفة ابطال

من حرب اكتوبر .

لو قلبنا كمان نلاقى فى قنوات تانية اوبريت لحرب اكتوبر وان لم تخنى الذاكرة

فالاوبريت دا يمكن تانى سنة بتذاع

فى الصحف والجرايد اتنشرت خطبة الريس الى اصبحت عادة سنوية فى حرب اكتوبر

ارجع واقول عمرنا ماحسينا حرب اكتوبر عمرنا ماحسينا قيمة الشهيد الى ضحى بنفسه عشان يحررها

عشان كدة انا جايبة النهاردة زكريات واحد كان عايش ايامها عن حرب اكتوبر

بجد احلى مليون مرة من اى حاجة شفناها عن الحرب

الله يمسيك بالخير يا استاذ محمد .......

دى بعض من زكرياته ايامها

جمال عبد الناصر مات سنة 1970طب و بعدين ؟؟

الراجل كان كل كام يوم بيروح الجبهةكان كل شوية يطمن الناس

و الجيش واحد و سبعين و اتنين و سبعين مظاهرات في الجامعة و المصانع

عايزين نحاربه و السادات ساكت ليه ؟؟كل شوية يقول لنا ده عام الحسم

و ما يعملش حاجةكل شوية يقول لنا كلنا جمال عبد الناصر

البلد كلها بتغلي كل الناس عايزة تحارب

كل يوم نكته جديدة تطلع على السادات و الزبيبة بتاعته

هو الراجل ده هاييجي ايه في عبد الناصر ؟؟

********************************************

ستة أكتوبر 1973 ميلادية10 رمضان 1393 هجرية

كنا أيامها في أول الدراسة تقريبا لسة من كام اسبوع الدراسة ابتدت

كنت في مدرسة اسماعيل القباني الثانوية اللي في ميدان عبده باشا

رجعت على البيت بعد المدرسة صليت الضهر و فتحت الراديو زي العادة

صايم بقى و باحب اسمع إذاعة الشرق الأوسط اللي كانت بتبتدي الساعة اتنين

بيان عسكري جديدعادي .. متعودين على كده قول يا سيدي

قوات اسرائيلية هاجمت الزعفرانة و السخنةيووووه .... تاني .... بيان تاني

قواتنا نجحت في صد الهجوم و سلاح الطيران بيضرب قوات العدوحلو كده

كويس قوياضربوهم ربنا معاكوا يا ولاد زي ما قالت أمي الله يرحمها

************************************

لغاية البيان رقم خمسةكان تقريباً بعد صلاة العصر بشوية

كان بصوت المذيع اللي لا يمكن أنسى صوتها لله يرحمه الأستاذ صبري سلامة

بسم الله الرحمن الرحيم إيه ؟؟؟

أول مرة يعملوهاأول مرة يبتدوا بيان عسكري بالبسملةهو فيه ايه ؟؟

نجحت قواتنا في اقتحام قناة السويس على طول القناةو اقتحمت خط بارليف

و ارتفع العلم المصري على الضفة الشرقية للقناة

إيه ؟؟

مين ؟؟

إزاي ؟؟

بابا كان نايم بعد ما جه من الشغل صحيناه فتحنا التليفزيون و الراديو على آخره

التاس كلها في الشارع مش مصدقة اللي بيحصل

انت سمعت الراديو يابو فلان ؟؟طب و بعدين ده بيقول لك على طول القناة

يعني حوالي 160 كيلو تقريباكل المسافة دي الجيش المصري عدى فيها القناةطب ازاي ؟؟

بابا قال لنا ده تلاقيه هجص زي أيام سبعة و ستين

لما كانوا كل شوية يقولوا أسقطنا سبعين طائرة

طب هات لنا لندن يا حمادة

هنا لندن القسم العربي بهيئة الإذاعة البريطانية

دول بيقولوا نفس الكلام

و المراسل من تل أبيب بيقول نفس الكلاممش ممكن ؟؟

يبقى الكلام بجد و لا إيه ؟؟

يا فرحتي

يا فرحة مصر كلها

***************************************

الله ايه الجمال ده انا محستش حرب اكتوبر الا لما قريت حكاوى استاذ محمد عنها

عارفين انا اتمنيت ايه

قولت

ياريتنى كنت ايامهم ياريتنى عشت وسط الناس الطيبين دول

الى كانوا بيحبوا مصر من غير نفاق ومن غير اى مصلحة

ودق جرس الهاتف

دق جرس الهاتف جريت مسرعة على غير عادتي

اشعر بان الهاتف يدق في قلبي يخبرني ان عزيزا علي يتصل
-ألو

-أمال؟

-ايوة

-عارفة مين بيكلمك؟

-طبعااااااااا كنت لسه بفكر فيك

كان صوته يعيد علي ذكريات من أحلى ايام حياتي

وددت الا تنتهي المكالمة
تمنيت ان اقول له اشتاق إليك بشدة وبجنون

اشتاق إلى لحظات لقائنا

اشتاق إلى كل مكان جمعنا معا

اشتاق إلى كل لحظة من هذه الايام الغابرة

اشتاق إليك لا ادري لم شعرت بشوقي إليك فجأة

ربما لانك من تبقى من عالمي الفاني

ربما لانك الوحيد الذي لم تتشوه صورته بداخلي ممن عرفتهم في زمان مضى

ربما لانك الوحيد الذي لا اذكر له ذكري واحدة تشينه

ربما لان كل شيء تغير وانا تغيرت ولكنك تبقى كما أنت

كل عيد يدق الهاتف في قلبي

نعم هاتف كل عام لا يكفي

نعم احتاج ان اراك لاستعيد احلى ذكريات حياتي

نعم لا يكفي فقط سماع صوتك فانا اشتاق ايضا إلى رؤياك
لكنه الممكن في هذا العالم الجديد فعالمنا الماضي محته رياح النسيان

ربما ما تبقى قليل لكنه ما يبقيني على قيد الحياة في عالم لا اعرف فيه نفسي
وانتشلني صوته من خواطري

-بابا موجود

-ايوة يا عمو موجود مع حضرتك

انه كان يوما مثل ابي

حقا اشتاق لرؤيته مثلما كنت اشتاق لصوته

الفرخة باضت
القاهرة منتصف 1975أنا النهاردة عند عمي في بير حمص، اللي هي من شارع الجيش، مفيش حد في البيت غير أنا وماما بطة مرات عمي، ماما بطة دي أطيب واحدة في الدنيا، بتربي فراخ في المنور وأنا بحب أتفرج ع الفراخ، ماما بطة مش بترمي أكل في الزبالة، عشان حرام، الرز الزيادة والعيش، إحنا بنرميه للفراخ، وبعدين الفراخ تكبر وتبيض، وناخد البيض بتاع الفراخ، وكمان عمرنا عند عمي ماشرينا فراخ من برةبيت عمي انضف بيت في الدنيا كل حاجة فيه في مكانها، الشوكة، السكينة، ومفيش عندهم طبلية، لازم ناكل على السفرة، وكمان ما نرميش اي حاجة، عشان هي بيكون ليها لازمة، بس مش بنحوش كراكيب عشان بتجيب حشرات، الحاجة تتنضف وتتشال، بس لازم تبقى نضيفة، حتى الهدوم القديمة، مش بتترمي، علشان بنقصصها، ونعملها كورارية كبيرة ونوديها لعم طه يعملها سجادة، كلها ألوان، انا باعمل كورارية كمان، وكمان عشان الفراخ تفضل نضيفة في العشة، كل يومين نجيب نشارة من ورشة النجار اللي برة في الحارة اللي عنده مكنة نشارة، انا بجيب النشارة الناعمة أوي، ونحطها للفراخ والفراخ بقى تعمل الحمام عليها، وعم سيد الزبال يقول ما ترموش النشارة بتاعت الفراخ وخلوها لوحدها عشان بياخدوها يحطوها عند الزرع، عشان يبقى الزرع جامد، وبعدين ناكل الزرع، واللي يفضل نرميه للفراخ، وبعدين الفراخ تبيض ..ييه دايرة وتلف.أنا بآخد معايا طارق صاحبي اللي عند عمي، ده بقى صاحبي أوي، وبنقول كل الأسرار لبعضيقعد يقولي اتغدوا ايه امبارحوانا اقوله اتغديت ايه امبارحبس نتفق إن السر في بيرطااااااااااااااااااارررررقيا ويكا يا ويكايا أآيأ يا أآيأ يا أآيأعايز ايهانزل معايا نجيب نشارة من مكنة الخشبمعاك شوال؟آه شوالين انت تشيل واحد وانا واحدما أكملش الكلام إلا وهو شادد مني الشوال بتاعه، وجري على مكنة الخشبعاوزين نأجر عجل بالليلالساعة بقت بشلنناخد ساعة ونروح على شارع الجيش، لغاية ميدان الجيش، وندخل الحسينية، وهناك نجيب سندوتشين بطاطس، ونطلع من هناك على باب الفتوح، وندخل على مدرسة السلحداردي مش مدرسة السلحدار، ده جامع الأنور، وابويا كان بيقولي أسمه جامع الحاكم بأمر الله.جامع إيه يا عبيط، والله العظيم مدرسة السلحداروصلنا مكنة الخشب، عبينا الشوالين، وراجعين على الحارة تاني وهوببببببااااااااااااااااااااااااااالناس بتجري من كل حتة، ايه ده الرجالة طالعة والدم سايح على وشها، وعلى جسمها، والنسوان كلها بتصوت،حاسب يا طارق

طب هاه اكمل الحكاية ولا لاه ياريت اعرف رايكم على فكرة مش انا الى كتبتها بس عجبتنى اوى قولت انقلها لمدونة بتاعتنا هنا لانى فيها حاجات جميلة وقصص حلوة

عادى .....منظر

دى كانت اجابة اختى لما سالتها "انتى عايزة تشترى موبايل ليه"
هذه الاجابة الوافية المستوفيه للمواصفات
_بجد بقت حاجة عجيبة الناس بقت تشترى موبايلات لمجرد المنظرة بيها
او بالبلدى عشانها قيمة وسيما
يعنى هما استفادوا بايه لما اشتروها لا قلل من قيمتهم ولا زودوها
_واحدعنده تسع سنين يمسك موبايل ليه فهمونى؟
_طيب واحدة غلبانة وفقيرة تشترى موبايل ليه؟
طالما معاها فلوس تشترى بيه حاجة تنفعها احسن
_بقى دلوقتى تفكيرنا فى اننا نشترى سلعة اى سلعة مش عشان قيمتها
او هى هتفيدنا بايه لا لمجرد انها هتخلى منظرنا شيك
وانها جاية من برة حتى لو مش هنستفيد بيها
_دلوقتى الانسان بقى بيتقيم من ناحية الماديات
على راى المثل الى بيقول "اللى معاهوش ميلزموش"
اهم حاجة فى مركز الانسان وقيمته انه معاه موبايل وعنده عربية وعنده شقة تمليك
الانسان اللى عايز الناس تحترمه لازم يبقى بالشكل ده
اما الانسان المثقف واللى بيحاول يبنى نفسه او يوصل للناس فكرة
طالما فقير يبقى انسان مهمل فى زاوية على جنب

ليه الناس بقت بتفكر بالاسلوب ده؟
ليه بقى كل تفكيرها فى الماديات والمظاهر؟
ليه بقت قيمة الانسان فى التراب لو هو مش معاه فلوس وامكانيات؟

الحب

الحب حاجة جميلة اوي وكبيرة اوي فعلا حاجة تستاهل اننا نضحي عشانها ونعيش عشانها ونموت عشانها كمان

الحب هو الدنيا والحياة بكل ما فيها ومن فيها الحب هو المعنى الوحيد اللي بيحسه الناس بنفس الطريقة وبيحسه كل انسان مهما كان مستوى ذكاءه او مستواه الاجتماعي او قربه او بعده عن ربنا او اي حاجة تانية

الحب المعنى الوحيد المطلق اللي لا تحده اي حدودالحب فعلا حاجة تستاهل الموت

لكن اي حب؟

قرأت امبارح قصة بنت توفت في حادثة عربية عشان اتصدمت صدمة جامدة في الانسان اللي حبته

وضحت بحاجات كتيرة عشانه وهو نفسه اللي سابها بعد خطوبة دامت 10ايام بس!!
وكلنا كل يوم بنسمع قصص عجيبة في الحب اللي تعارض اهلها وتعقهم عشان الانسان اللي بتحبه

واللي يسيب بيته عشان باباه مش موافق انه يتزوج من فلانة اللي هيموت عليها

واللي مش لاقي نفسه لانه لسه محبش لحد دلوقتي

واللي تايه من بعد ما اللي بيحبه سابه وخانه وحب غيره

واللي فقدت الثقة في الناس كلها عشان واحد ضحك عليها واوهمها انه بيحبها وطلع في الاخر بيتسلى

والولد اللي فقد الثقة في البنات كلهم عشان بنت طلعت بتلعب بيه وبتخدعه

والناس الكتير اللي ضاع عمرهم ورا سراب كبير اسمه حب
اه الحب مهم وفعلا الزواج لازم يكون فيه حب ومينفعش حد يرتبط بحد مش بيحبه
دا انا بتكلم بس عن اللي بيحب وبيراعي ربنا في حبه ومش بيعصيه لان الحب اللي بيجيب معاصي مفيش فايدة من الكلام عنه
النوع دا من الحب مش كل حاجة النوع دا شارع صغير اوي من عالم الحب

في حب اكبر حب يجلب سعادة لصاحبه ويوفقه لاختيار زوج صالح وتكوين اسرة صالحة

حب هو الحب كله وبيعلم الحب كله
حب الله-سبحانه وتعالى-
رسالة إلى كل واحد ضيع ايام وشهور وسنين من عمره بيدور على حب في مكان غير مكانه الصحيح
احب الله يحبك الله

طيب انا عايزة اعرف حاجة

في سعادة في الدنيا دي تكون اكبر من سعادة انسان بيحب ربنا اوي وربنا بيحبه؟

{ قل إن كان آباؤكم وأبناؤكم وإخوانكم وأزواجكم وعشيرتكم وأموال اقترفتموها وتجارة تخشون كسادها ومساكن ترضونها أحب إليكم من الله ورسوله وجهاد في سبيله فتربصوا حتى يأتي الله بأمره والله لا يهدي القوم الفاسقين }

"ومن الناس من يتخذ من دون الله أنداداً يحبونهم كحب الله والذين آمنوا أشد حباً لله ولو يرى الذين ظلموا _ أي ظلموا أنفسهم بالكفر والشرك _ إذ يرون العذاب أن القوة لله جميعاً وأن الله شديد العذاب"

وقال احد الصالحين :

"مساكين اهل الدنيا خرجوا منها وما زاقوا اطيب ما فيها قيل وما أطيب ما فيها؟

قال حلاوة الأنس بالله"

اللهم اني اسألك حبك وحب من أحبك وحب عمل يقربني إلى حبك

نجم

هتعمل ايه لو نمت يوم وصحيت بصيت....وشفت نفسك فى المراية بكيت

جواك سؤال تصرخ تقول انا مين انا مين انا زى مانا ولا اتقسمت اتنين

و بعدين

بعدين قول يالى فى المرايا فهمنى ايه الحكاية

فرحان تعبان مرتاح ندماان حاجات كتير فى حياتنا اتسببت فى حيرتنا

اتسببت فى حيرتنا واديناعايشين راضين

على خلفية الاغنية دى الى مالهاش حل دعبست شويفة عل

فيس بوك لحد ماوصلت لجروب لاحمد فؤاد نجم

ومنها قمت باولى زياراتى لمدونة احمد فؤاد نجم اسمها "مكنة الفاجومى"

والفاجومى لمن لايعرف_وانا اصلا مكنتش اعرف بردو_

هو شخص نقده لازع بهجوم ولا يهمه شئ

بجد المدونة مالهاش حل جميلة اوى

دى بعض حاجات منها

صباح الخير على الورد اللى فتح فى جناين مصر
صباح الخير علي الورد اللي فتح في جناين مصر/

صباح العندليب يشدي بألحان السبوع يا مصر/

صباح الدايه واللفه ورش الملح في الزفه

/ صباح يطلع بأعلامنا من القلعه لباب النصر/

سلامتك يامه يا مهره يا حباله/ يا ولاده/

يا ست الكل يا طاهره/ سلامتك من آلام الحيض/

من الحرمان/ من القهره/ سلامة نهدك المرضع/

سلامة بطنك الخضرا/ هناكي وفرحة الوالدة/

تضمي الولد يا والده/ يصونهم لك ويحميهم/

يكترهم/ يخليهم/ يجمع شملهم بيكي/ يتمم فرحتك بيهم/

صباح الخير علي ولادك/ صباح الياسمين والفل/

تعيشي ويفنوا حسادك/ ويسقوهم كاسات الذل/

وبلغ يا سمير غطاس/ يا ضيف المعتقل سنوي/

بصوتك دا اللي كله نحاس/ صباح الخير على الثانوي

/ وأهلا بيكو في القلعه/ وباللي في الطريق جايين/

ما دامت مصر ولاده/ وفيها الطلق والعاده

/ حتفضل شمسها طالعه/ برغم القلعه والزنازين

اعذرونى ان كانت قديمة شوية فده من جهلى انا

طيب اقروا دى كدة

اسكندرية
يا اسكندريه

بحرك عجايب

ياريت ينوبني م الحب نايب

تحدفني موجه

على صدر موجه

والبحرهوجه

والصيد مطايب

أغسل هدومي

وأنشر همومى

على شمسه طالعه

وأنا فيها دايب

كأني فلاح في جيش عرابي

مات ع الطوابي

وراح في بحرك

كأني نسمه فوق الروابي

م البحر جايه

تغرق في سحرك

كأني كلمه من عقل بير م

كأني غنوه من قلب سيد

كأني جوا المظاهره طالب

هتف باسمك

ومات معيد

كأني صوت النديم

في ليلك

بيصحي ناسك

يشدوا حيلك

كأني طوبه من بيت في حاره

كأني دمعه

في عيون سهارى

كأني نجمه فوق الفنار

هتهدي الحيارى

والبدر غاي

بيا اسكندريه

يامصراويه

على سن باسم

على ضحكه هاله

البحر

شباك ومشربيه

وانتي الاميره

ع الدنيا طاله

يا اسكندريه عاشق

وبدوي

ارتاح في حضنك

والود ودي

يكون كلامي

عربون غرامي

وبالمحبه

ناخد وندي

يا اسكندريه فيكي الغلابه

ع الرزق يسعوا ولايناموش

صبح صباحهم

رجع مساهم

وزاد شقاهم

ومارتاحوش

يا عيني ع اللي الزمان تعبهم

وضاع تعبهم

ومالتقوش

نزل شبكهم

في بحر طامي

طلع شبكهم

على فاشوش

وفيكي بين البشر

دياب

وفيكي فوق البشر

وحوش

وفيكي ناس مغرمين صبابه

لو خان زمانهم

مابيخونوش

وفيكي خمر ي

سلمت امري

ما اقدرش اشوفه

وما انيلوش

سمك يا بني يا اسكندراني

في العشق واحد

مالكش تاني

سمك يابني يا اسكندراني

في الحسن ساحر ومعجباني

سمك يابني

والعشـق غيه

تبدأ بنظره

تبقى ملاغيه

وكل عاشق وله بهيه

وكل شاعر وله اغاني

وأنا اللي عشق الصبايا كاري

أعشق وأغني ما اقدرش اداري

واي نظره بتجيب قراري

وايشحال عيونك

يا الاسمراني

يااااااااااه ايه الجمال ده

طيب شوف كمان بيقول ايه

الحمد لله خبطنا

تحت بطاطنا

يا محلا رجعه ظباطنا

من خط النار

يا اهل مصر المحميه

بالحراميه

الفول كتير والطعميه

والبر عمار

والعيشه معدن واهي ماشيه

اخر اشيا

مادام جنابه والحاشيه

بكروش وكتار

ح تقول لى سينا وما سينا شي

ما تدوشناشي

ما ستميت اوتوبيس ماشى

شاحنين انفار

ايه يعني لما يموت مليون

او كل الكون

العمر اصلا مش مضمون

والناس اعمار

الحمدلله وأهي

ظاطت

والبيه حاطط

في كل حته

مدير ظابط

وإن شالله

حمار

ايه يعني فى العقبه جرينا

ولا ف سينا

هى الهزيمه تنسينا

اننا احرار

ايه يعني شعب ف ليل ذلةضايع

كله دا كفاية بس اما تقول له

احنا الثوار

والحمد الله ولا حولا

مصر الدوله

غرقانة فى الكدب علاولة

ولهوالشعب احتار

وكفايه اسيادنا البعدا

عايشين سعدا

بفضل ناس تملا المعده

وتقول اشعار

اشعار تمجد وتماين

حتى الخاين

وان شا الله يخربها مداين

عبد الجبار

اخر حاجة بقى عايزة اوراهالكوا الكلام الى زى الفل ده

قالوا يا جحا بيت أبوك بيقع قال أما الحق أخد لي طوبة.

كام مصري دلوقتي بيشتغلوا بالمنطق ده؟

اللي بيطول حاجة بيخطفها و اللي بيخطفوا كتير قوي و يهربوا كمان,

و إحنا لسه بنلاقي العيش, هي دي مصر.

شوفوا صلاح جاهين "بحبها و هي مالكة الأرض شرق و غرب و أحبها

و هي مرمية جريحة حرب" احنا دلوقتي مرمية جريحة حرب مصر

دلوقتي مرمية جريحة حرب الله يرحمك يا صلاح ..

العاصمة دي هي اللي انخبل بيها السلطان سليم الأول

اللي قال "هذا الجمال يليق بعاصمة"

و لذلك سرقوا كل التحف و بعض المعمار من مصر

نقلوه للأستانة و خدوا الصنايعية المصريين

اللي عملوا القاهرة المملوكية و جيه إسماعيل باشا

عمل القاهرة و الأوبرا هنا و زي ما قولتلكم

نقل مصر نقلة نوعية بعد ما محمد علي عمل القناطر,

أنا سألت مهندس ري و قالي القناطر دي تعتبر اكبر

مشروع في القرن التاسع عشر و أنها طفرة

نوعية في الزراعة مش ده كان في مصر

و لا فين هو أنا بحبها من شوية؟

كل ما امشي اتكعبل في بستان

ما احبهاش ليه بقى؟ علشان أنضحك

علينا شوية و نعسنا شوية خلاص حنيأس

, طيب لو راح الجيل ده حيصحى اللي بعده .

. أيه رأيكوا بقى؟ البلد دي ماشية ع الحال ده من

سنين و اللي يحترم نفسه بيستني في قلوب الناس

شوفوا كدة ابهاتنا او اى راجل ماشى فى الشارع وحبه للبلد والراجل ده ,

عنده ييجى ميت سنة ولسه عنده امل

يمكن اكون طولت عليكو شوية بس بجد انا بحس مصر اوى

لما اقراا حاجة للراجل ده

فيه لسة امل

وعلمه....وصلت

خيركم من تعلم القرأن و علّمه..

"هكذا تعلمنا من ربنا ..و هكذا صار منهجنا "

حين تجد ان بأمكانك فتح طريق للاخرين ..حين تجد ان لديك بعض الخبرة فى مجال ما ... حين تجد ان هناك من الكوادر الصحفية من يريد ان يصنع كوادر اخرى صغيرة .. حينما تتوفر النية للاصلاح و العزيمة على الانجاز ..

حينما تطلب من الله ان يهبك عملا صالحا يقربك اليه ..كانت البداية ..

تفتح طريقا امام كل من اراد الصحافة لنفسه مهنة تمنحك تدريب على كافة فنون الصحافة و حقوق الانسان مجانا

و تمنحك ايضا شهادة معتمدة من مركز الاندلس لدراسات التسامح و مناهضة العنف وعلّمه

فريق تدريب اعلامى يستعين بخبرات صحفية رائدة امثال:-

*استاذ طارق التهامى رئيس القسم السياسى فى الوفد"

*استاذة سهير عثمان (استاذ مساعد فى كلية الاعلام .. ورئيس صفحة علوم وتكنولوجيا فى موقع محيط)

*و اخرون (مفاجأة )

هى قصة نسجنا احلامنا فيها خيطا خيطا .. كتبنا بدايتها و لكم انتم حبكتها و احداثها ..و علمه تتكفل بتدريب 35 ممن يرغبون فى الدورة الواحدة بأسبقية الحجز .

اللي عايز يحجز يا جماعة يبعت ايميل لينا على الميل الموجود في البلوج دا تمام

فيه اسمه ورقم تليفونه .