قعدة سحور

فضلت افكر وقت طويل اكتب ايه عن رمضان وفى اول ليلة من لياليه
حسيت فى الليلة دى بمشاعر حلوة اوى مابين لمة العيلة وسماع صلاة التراويح
ورؤية فوانيس رمضان
غير طبعا صوت الصواريخ وبرغم صوته الا انه كان دليل على رمضان وجماله
ومنظر الاطفال فى الشارع وهما فرحانين بالصواريخ ولا شكلهم وهما بيركبوا فوانيس رمضان
بتحس بحالة الواحد بيستناها من السنة لسنة
عموما انا ملقيتش النهاردة اننا نبدا المدونة الا بالكتابة عن الليلة دى بالذات اول ليلة فى رمضان
بداية شهر من احلى الشهور وروحانيات الواحد بيحسها اوى فى الشهر ده
الادان والصلاة ليهم طعم تانى .
الابتسامة مفرقتنيش طول الليلة دى والله وانا واقفة فى البلكونة وشايفة نور الجوامع من حواليا
كانى حييت من جديد.
انك تحس انك بتعمل الى معملتوش طول السنة وبتعمله بحب واخلاص سواء ذكر الله او دعاء او صلاة او قراءة القران
وياسلام لما بسمع اغانى رمضان واغنيها حالة تانية .
وانك تحس انى مفيش حد هينام الليلة دى كل صاحى ومستنى وقت السحور وبعدها صلاة الفجر
وانك تحس انه كل متجمع من وقت طويل سواء فى الفطار او فى السحور وانك تنزل تصلى الفجر
اما عن السحور فده طقس خاص جدا وجميل اوى
لما يتلم كل البيت قعدة واحدة وفى وقت واحد وعلى مائدة وواحدة
ده غير صوت المسحراتى الجميل لما يقول
"اصحى يا نايم وحد الدايم رمضان كريم"
الله اكرم وكل سنة وانتوا طيبين
حقيقى كل حاجة النهاردة "غير" وياريتنا نفضل متجمعين كدة على طول
امين