قعدة فطار

بما انك يا رنا تكلمتي عن قعدة سحور قلت اتكلم انا عن قعدة الفطار

زمان ايامنا يعني بردو مش ايام حد تاني
مكنش فيه نت ولا دش ولا الحاجات دي ولا موبايلات ولا وجع دماغ
كان الواحد يقعد يفطر وسط اهله يتفرج على بوجي وطمطم ويشربوا الشاي
تكون الكاميرا الخفية جت ويلفوا على التلات قنوات اللي كانوا موجودين ساعتها
وبعدين يقفلوا التلفزيون ويقعدوا سوا
دلوقتي بوجي وطمطم بقى فيه منه عشرة والقنوات بدل التلاتة تلتومية
والناس بدل اما تقعد مع بعضها تسأل على بعضها يحكوا ويفكروا ويتناقشوا بقوا يبحلقوا في التلفزيون لحد السحور يتسحروا ويناموا ويصحوا تاني يوم بفس الطريقة
بقينا اليين اوي
ندوس على زرار عشان فيلم وندوس على زرار نكلم مش عارفة مين
بقينا خطوط
اتصالات على فضائيات
بقينا بنسمع اكتر ما بنتنفس ونشوف اكتر ما بنحس
بقينا الات استقبال لاشارات التلفزيون والدش
بقينا الات كتابية على النت والشات
حتى الفوانيس مبقتش فوانيس بقى في حاجة اسمها الفانوس التكتك

انا نفسي في فطار من غير دش وتلفزيون ولا نت وموبايل ولا فانوس تكتك
نفسي في فطار زي زمان وفانوس شمع كمان
احلى حاجة في الفانوس ايه ؟ انك تتلسع منه كدا وتشم ريحة الشمعة
احلى حاجة في رمضان ايه ؟انك تقرب من ربنا
احلى حاجة في الفطار ايه؟
والله مش اللحمة
اللمة يا جدعان